అయోధ్యలో దారుణం.. పార్కులో ప్రేమజంటపై కాషాయ వస్త్రధారుల దాడి.. వీడియో వైరల్!

పుణ్యక్షేత్రం అయోధ్యలో ఒక దారుణ ఘటన చోటుచేసుకుంది. పార్కులో ఏకాంతంగా కూర్చున్న ఒక యువ జంటపై కాషాయ వస్త్రాలు ధరించిన కొందరు వ్యక్తులు దాడికి పాల్పడ్డారు. వారిని వెంబడించి, తీవ్రంగా కొట్టిన ఈ ఘటనకు సంబంధించిన వీడియో గురువారం సోషల్ మీడియాలో వైరల్ కావడంతో దేశవ్యాప్తంగా తీవ్ర విమర్శలు వెల్లువెత్తుతున్నాయి. పోలీసులు ఈ ఘటనపై విచారణ ప్రారంభించి, ఇద్దరు అనుమానితులను అదుపులోకి తీసుకున్నారు.

అస‌లేం జ‌రిగిందంటే!
అయోధ్యలోని తులసి ఉద్యాన్ అనే పార్కులో ఈ ఘటన జరిగినట్లు తెలుస్తోంది. వైరల్ అయిన వీడియో ప్రకారం, కాషాయ వస్త్రాలు ధరించిన నలుగురు వ్యక్తులు పార్కులో కూర్చున్న యువ జంటతో వాగ్వాదానికి దిగారు. మాటల యుద్ధం కాస్తా శారీరక దాడిగా మారింది. నిందితులు ఆ జంటపై పిడిగుద్దులు కురిపిస్తూ, తన్నుతూ దుర్భాషలాడారు. భయపడిన ఆ జంట పార్కు మెయిన్ గేటు వైపు పరుగెత్తేందుకు ప్రయత్నించగా, దాడి చేసిన వారు వారిని వెంబడించారు.

పార్కు బయటకు వచ్చిన తర్వాత కూడా ఆ యువకుడిపై దాడి కొనసాగింది. ఇది చూసి తట్టుకోలేకపోయిన యువతి, తన భాగస్వామిని కాపాడేందుకు అతన్ని అంటిపెట్టుకుని నిలబడింది. దాడిని ఆపాలని ప్రయత్నించింది. అయినా ఆగని దుండగులు ఆమెను కూడా దూషించినట్లు వీడియోలో కనిపిస్తోంది. బహిరంగ ప్రదేశంలో ఈ దాడి జరుగుతున్నా, చుట్టూ ఉన్నవారు ఎవరూ అడ్డుకునే ప్రయత్నం చేయలేదు. కొందరు తమ ఫోన్లలో ఈ ఘటనను రికార్డు చేస్తూ ఉండిపోయారు.

పోలీసుల దర్యాప్తు.. నిందితుల వాదన
ఈ ఘటన లక్ష్మణ్ ఘాట్ పోలీస్ అవుట్‌పోస్ట్ పరిధిలోకి వస్తుందని అధికారులు తెలిపారు. వీడియో వైరల్ అయిన తర్వాత పోలీసులు దీనిపై విచారణ ప్రారంభించారు. బాధితుల నుంచి అధికారికంగా ఎలాంటి ఫిర్యాదు అందకపోయినా, వీడియో ఆధారంగా దర్యాప్తు చేస్తున్నట్లు అయోధ్య కొత్వాలి ఎస్‌హెచ్‌ఓ పంకజ్ సింగ్ తెలిపారు. ఇప్పటికే ఈ ఘటనకు సంబంధించి ఇద్దరు అనుమానితులను అదుపులోకి తీసుకుని ప్రశ్నిస్తున్నట్లు ఎస్పీ సిటీ చక్రపాణి తివారీ ధ్రువీకరించారు. వారిని గోండాకు చెందిన ధర్మేంద్ర దాస్, గుణకేశ్ తివారీగా గుర్తించారు. వీరు చదువు నిమిత్తం అయోధ్యలో ఉంటున్నట్లు పోలీసులు వెల్లడించారు.

విచారణ సమయంలో నిందితులు తమ వాదనను పోలీసుల ముందుంచారు. పార్కులో ఆ జంట 'అసభ్యకరంగా' ప్రవర్తిస్తుండటంతో తాము స్పందించామని వారు చెప్పినట్లు సమాచారం. వారి ప్రవర్తన తమకు అభ్యంతరకరంగా అనిపించడంతోనే దాడి చేశామని నిందితులు పేర్కొన్నారు. ఈ నిందితులకు ఏదైనా మతపరమైన సంస్థతో లేదా అఖాడాతో సంబంధాలు ఉన్నాయా? అనే కోణంలో కూడా పోలీసులు దర్యాప్తు చేస్తున్నారు.

మత పెద్దల ఖండన
ఈ దాడి ఘటనను అయోధ్యలోని ప్రముఖ మత పెద్దలు తీవ్రంగా ఖండించారు. సంకట్ మోచన్ సేన జాతీయ అధ్యక్షుడు మహంత్ సంజయ్ దాస్ మాట్లాడుతూ.. "ఇలాంటి ఘటన ఎప్పటికీ జరగకూడదు. ఆ జంటకు నచ్చజెప్పి ప్రశాంతంగా పంపించి ఉండాల్సింది. ఈ హింసాత్మక చర్యను ఎంత ఖండించినా తక్కువే" అని అన్నారు. శ్రీరామ వల్లభ కుంజ్ చీఫ్ స్వామి రాజ్ కుమార్ దాస్ కూడా ఈ దాడిని ఖండిస్తూ.. "అయోధ్యకు వచ్చిన వారి పట్ల ఎవరూ ఇలా ప్రవర్తించకూడదు. ఇది ఖండించదగిన చర్య. మతపరమైన ప్రదేశం యొక్క మర్యాదను ఉల్లంఘిస్తున్నారని ఎవరికైనా అనిపిస్తే, వారికి మర్యాదగా సలహా ఇవ్వాలి కానీ, శారీరకంగా దాడి చేయడం సరైంది కాదు" అని స్పష్టం చేశారు.